Free Cervical Cancer Vaccine for All Girls in Maharashtra, Announces Health Minister Prakash Abitkar राज्यातील मुलींना गर्भाशय मुख कर्करोग लस मोफत, आरोग्यमंत्री प्रकाश आबिटकर यांची घोषणा

राज्य सरकारने राज्यातील सर्व मुलींना गर्भाशय मुख कर्करोग प्रतिबंधक लस मोफत उपलब्ध करायची घोषणा केली आहे. आरोग्यमंत्री प्रकाश आबिटकर यांनी सांगितले की, यासाठी लवकरच आवश्यक तरतूद करण्यात येईल, आणि राज्याचे अर्थमंत्री याबाबत घोषणा करणार आहेत. या महत्वाच्या घोषणेला दिवंगत आमदार लक्ष्मण जगताप यांच्या जयंतीनिमित्त आयोजित अटल महाआरोग्य शिबिरात अधिकृत दुजोरा गेला.

अटल महाआरोग्य शिबिर – १ लाख २१ हजार नागरिकांचा लाभ
सांगवी येथील पीडब्ल्यूडी मैदानावर आयोजित अटल महाआरोग्य शिबिरात १ लाख २१ हजार ५२३ नागरिकांनी लाभ घेतला. या शिबिरात ससून हॉस्पिटल आणि अन्य नामांकित रुग्णालयांचा सहभाग होता. शिबिराच्या पहिल्या दिवशी ४८ हजार ७६३ नागरिकांनी विविध तपासण्या आणि उपचारांचा लाभ घेतला. शिबिरात विविध तपासण्या, उपचार आणि मोफत शस्त्रक्रियांची सुविधा उपलब्ध होती.

सर्वसमावेशक तपासणी आणि उपचार
या शिबिरात कॅन्सर तपासणी, सोनोग्राफी, एक्स-रे, रक्त तपासण्या, डायलिसिस, नेत्ररोग तपासणी, कृत्रिम अवयव वाटप, हृदय रोग, किडनी विकार, लिव्हर प्रत्यारोपण, कॅन्सर उपचार, हाडांचे विकार, स्त्रीरोग, बालरोग, न्यूरोथेरेपी, आयुर्वेदिक उपचार आणि मोफत शस्त्रक्रियांची सुविधा नागरिकांना मिळाली. हे शिबीर महाराष्ट्र शासन, आरोग्य विभाग, पिंपरी चिंचवड महापालिका, प्रतिभा महिला प्रतिष्ठान, चंद्ररंग चॅरिटेबल ट्रस्ट आणि अटल चॅरिटेबल फाउंडेशन यांच्या सहकार्याने आयोजित करण्यात आले.

पंकजा मुंडे यांचे भाषण

शिबिरात पर्यावरण व पशुसंवर्धन मंत्री पंकजा मुंडे यांनी संबोधित करताना सांगितले की, “लोकप्रतिनिधीला मतदार संघाच्या विकासाबरोबरच लोकांच्या आरोग्याची काळजी घेणं महत्त्वाचं आहे. मी दिवंगत आमदार लक्ष्मण जगताप यांच्यासोबत काम केलं आहे आणि आमदार शंकर जगताप यांच्या कार्यशैलीत त्यांची झलक दिसते.” यासोबतच, नागरिकांना कोणत्याही आजाराचे निदान झाल्यास मुख्यमंत्री सहायता निधीतून मदतीची घोषणा देखील केली.

शंकर जगताप यांच्या नेतृत्वाखाली शिबिराचे आयोजन
शिबिराचे मुख्य संयोजक आणि भाजपचे शहराध्यक्ष आमदार शंकर जगताप यांनी शिबिराच्या आयोजनाबद्दल माहिती दिली. “हे शिबिर महाराष्ट्र शासन आणि आरोग्य विभागाच्या सहकार्याने आयोजित करण्यात आले आहे आणि या उपक्रमाने नागरिकांपर्यंत आरोग्य सेवा पोहोचवली आहे,” असे त्यांनी सांगितले.

या महाआरोग्य शिबिराच्या माध्यमातून अनेक लोकांना मोफत तपासण्या आणि उपचारांची सुविधा मिळाली. तसेच, गर्भाशय मुख कर्करोगाच्या लसीच्या वितरणाचा निर्णय राज्य सरकारच्या दूरगामी दृष्टीकोनातून घेण्यात आला आहे. या उपक्रमामुळे महिलांच्या आरोग्याची काळजी घेतली जाईल आणि कर्करोगाचे प्रमाण कमी करण्यास मदत होईल.