लंडन ट्रिपच्या बहाण्याने मोशीतील नागरिकाची दीड लाखांची फसवणूक; भोसरी एमआयडीसी पोलिसांत गुन्हा दाखल

मोशी: परदेशवारीचे स्वप्न दाखवून आणि स्वस्तात विमान तिकीट काढून देण्याचे आमिष दाखवून मोशी प्राधिकरणातील एका नागरिकाची तब्बल १ लाख ६४ हजार ७०० रुपयांची आर्थिक फसवणूक झाल्याचा धक्कादायक प्रकार उघडकीस आला आहे. या प्रकरणी एमआयडीसी भोसरी पोलीस ठाण्यात एका भामट्याविरोधात गुन्हा दाखल करण्यात आला आहे.

फिर्यादी आणि आरोपी कोण? याप्रकरणी दुर्गेश परशुराम चव्हाण (वय ४६, रा. हृदय रेसिडेन्सी, संतनगर, मोशी प्राधिकरण) यांनी एमआयडीसी भोसरी पोलीस ठाण्यात शुक्रवारी (१७ एप्रिल) अधिकृत फिर्याद दिली आहे. त्यांच्या तक्रारीवरून पोलिसांनी डेनिस पटेल (वय अंदाजे ४६, रा. रक्षक नगर, खराडी, पुणे) याच्याविरुद्ध भारतीय न्याय संहिता (BNS) २०२३ चे कलम ३१८(४) आणि भारतीय दंड विधान (IPC) कलम ४२० नुसार फसवणुकीचा गुन्हा दाखल केला आहे.

कशी झाली फसवणूक? पोलिसांनी दिलेल्या माहितीनुसार, आरोपी डेनिस पटेल याने फिर्यादी दुर्गेश चव्हाण यांच्याशी ओळख वाढवून त्यांचा विश्वास संपादन केला. त्यानंतर त्याने चव्हाण यांना लंडन ट्रिपसाठी विविध आकर्षक ऑफर्स असल्याचे आमिष दाखवले. ७ मे २०२६ रोजीच्या मुंबई ते लंडन प्रवासासाठी एअर इंडियाची तिकिटे बुक करून देतो, असे सांगून त्याने चव्हाण यांच्याकडून वेळोवेळी एकूण १ लाख ६४ हजार ७०० रुपये उकळले.

पैसे मिळाल्यानंतर आरोपीने चव्हाण यांना एअर इंडियाची तीन ‘नॉन-कन्फर्म’ तिकिटे पाठवली. मात्र, प्रत्यक्ष एअर इंडियाच्या अधिकृत वेबसाईटवर जाऊन कोणतेही पेमेंट न करता त्याने ही बनावट तिकिटे दिली होती. आपली फसवणूक झाल्याचे लक्षात येताच चव्हाण यांनी थेट पोलिसांत धाव घेतली.

पुढील तपास सुरू हा सर्व प्रकार डिसेंबर २०२५ ते जानेवारी २०२६ या काळात घडला होता. अखेर खात्री झाल्यानंतर चव्हाण यांनी पोलिसांत तक्रार दाखल केली. या प्रकरणी अद्याप आरोपीला अटक करण्यात आलेली नसून, पोलीस उपनिरीक्षक (PSI) खडसे या प्रकरणाचा पुढील तपास करत आहेत. परदेशात जाण्याच्या नादात अनोळखी व्यक्तींवर किंवा अनधिकृत ट्रॅव्हल एजंट्सवर विश्वास न ठेवण्याचे आवाहन पोलिसांकडून करण्यात आले आहे.