‘Action Plan’ Announced for Rehabilitation of Small Entrepreneurs in Pimpri-Chinchwadकुदळवाडी-चिखली अतिक्रमण प्रकरणी आमदार लांडगे यांची महापालिकेशी चर्चा

पिंपरी, ता. २० उद्योगनगरी पिंपरी चिंचवड च्या जडणघडणीत चिंचवडच्या कारखानदार आणि लघुउद्योजकांचा मोलाचा वाटा आहे. त्यांच्या पुनर्वसनासाठी लवकरच ‘अॅक्शन प्लॅन’ बनवण्यात येईल, अशी भूमिका महापालिका प्रशासनातील अधिकाऱ्यांनी मांडली. महापालिकेने जाधववाडी परिसरातील अनधिकृत बांधकामे व अतिक्रमणांवर कारवाई केली. त्यासंदर्भात मराठा चेंबर ऑफ कॉमर्सच्या कार्यालयात बैठक झाली. त्यास आमदार महेश लांडगे, मराठा चेंबर ऑफ कॉमर्सचे माजी अध्यक्ष दीपक करंदीकर, उपायुक्त मनोज लोणकर, क्षेत्रीय अधिकारी अजिंक्य येळे, श्रीकांत कोळप, प्रकाश गुप्ता, गोरख भोरे उपस्थित होते.

आमदार लांडगे म्हणाले, “कुदळवाडी-चिखली अतिक्रमण प्रशासनासोबत बैठक झाली होती. त्यावेळी रस्ते आणि आरक्षणांमध्ये अडथळा ठरणारी, इंद्रायणी नदी प्रदूषण, वायू-ध्वनी प्रदूषणास कारणीभूत ठरणारी आणि अनधिकृत भंगार व्यावसायिकांवर कारवाई करण्याचे निश्चित केले होते. पण, प्रशासनाने सरसकट कारवाई केली. त्यामुळे लघुउद्योजक आणि भूमिपुत्रांचे नुकसान झाले आहे. उद्योग, उद्योगक्षेत्र आणि उद्योजक यांच्या सर्वसमावेशक विकासासाठी नेहमीच पाठीशी राहण्याची भूमिका आमची आहे. यासाठी लवकरच मुख्यमंत्री देवेंद्र फडणवीस यांची भेट घेणार आहोत.”

कुदळवाडीप्रमाणे सरसकट कारवाई करून लघुउद्योजक आणि भूमिपुत्रांना त्रास होईल, अशी कारवाई करू नये, अशी भूमिका महापालिका प्रशासनासमोर मांडली. उद्योग क्षेत्रासाठी शहरात सकारात्मक वातावरण निर्माण व्हावे, नियम-अटी आणि विविध परवानगीसाठी सर्वतोपरी सहकार्य करावे, अशी विनंती भोसरी चे आमदार महेश लांडगे यांनी केली आहे .

महापालिकेच्या कारवाईमुळे बाधित झालेल्या उद्योजकांनी काही मागण्या सादर केल्या आहेत. त्यांनी मागितले आहे की, तात्पुरत्या स्वरूपात यंत्रे, कच्चा माल आणि इतर साहित्य ठेवण्यासाठी सोय करावी. याशिवाय, महापालिकेच्या विकास आराखड्यानुसार आरक्षणे असतील, तर मराठा चेंबर सहकार्य करेल, अशी घोषणा करण्यात आली आहे.

लघुउद्योजकांना त्रास न होण्यासाठी उपाय योजना किंवा अॅक्शन प्लॅन तयार करावा, अशीही मागणी उद्योजकांकडून करण्यात आली आहे. या मागण्यांमध्ये उद्योजकांच्या समस्यांवर लक्ष केंद्रित करण्याचा आणि त्यांच्या हिताचे संरक्षण करण्याचा प्रयत्न दिसून येतो.

मराठा चेंबर स्पष्ट केले आहे की, महापालिकेच्या विकास योजनांमध्ये सहकार्य करण्यासाठी ते तयार आहेत, परंतु लघुउद्योजकांच्या हिताचे रक्षण करणे हा त्यांचा प्राथमिक उद्देश आहे. या संदर्भात लवकरच एक अॅक्शन प्लॅन तयार करण्यात येईल, अशी अपेक्षा व्यक्त करण्यात आली आहे.