Demand for substantial Provision for Development in Chinchwad Constituency in Upcoming Budget चिंचवड मतदारसंघातील विकासासाठी महापालिकेच्या अंदाजपत्रकात भरीव निधीची तरतूद करण्याची मागणी
substantial Provision for Development in pimpri Chinchwad Constituency in Upcoming Budget पिंपरी चिंचवड मतदारसंघातील विकासासाठी महापालिकेच्या अंदाजपत्रकात भरीव निधीची तरतूद
पिंपरी-चिंचवड महापालिकेच्या आगामी अंदाजपत्रकात चिंचवड मतदारसंघातील विकास कामांसाठी भरीव निधीची तरतूद करण्यासंदर्भात महत्त्वपूर्ण बैठक पिंपरी-चिंचवड महानगरपालिका आयुक्त श्री. शेखर सिंह यांच्या सोबत झाली. या बैठकीत, काही वर्षांपासून वित्त आयोगाच्या नियमानुसार लोकसंख्येच्या प्रमाणात आवश्यक निधी उपलब्ध होत नसल्याबद्दल तक्रार केली गेली. विशेषत: आगामी आर्थिक वर्षाच्या अंदाजपत्रकात चिंचवड मतदारसंघाच्या विकासासाठी विशेष निधीची तरतूद करण्यात यावी, अशी आग्रहाची मागणी आमदार शंकर जगताप यांनी केली.
मुख्य मुद्दे आणि मागण्या:
रस्ते आणि पायाभूत सुविधा:
- चिंचवड मतदारसंघात नवीन डीपी रोड विकसित करणे.
- वाढते नागरीकरण लक्षात घेता किवळे, रावेत, मामुर्डी, पुनावळे आणि वाकड परिसरात पायाभूत सुविधा विकसित करणे.
- विकास आराखड्यातील रस्त्यांसाठी निधीची तरतूद.
शहर नियोजन आणि नागरी सुविधा:
- वाकड येथे वर्किंग वुमन होस्टेल प्रकल्पासाठी केंद्र सरकारच्या मदतीने निधी उपलब्ध करणे.
- काळेवाडी भागात रस्त्यांची कामे पूर्ण करणे.
- नव्या भागांमध्ये मलनिस्सारण केंद्रे उभारण्यासाठी निधी राखीव ठेवणे.
- पिंपळे गुरव ते दापोडी नवीन पूल विकसित करण्यासाठी निधी उपलब्ध करणे.
- ताथवडे, रावेत, मामुर्डी आणि किवळे भागातील ‘मिसिंग लिंक’ रस्त्यांचे काम पूर्ण करणे.
शिक्षण आणि पाणीपुरवठा:
- रावेत गायरान भागात नवीन शाळेची इमारत उभारण्यास निधीची मागणी.
- मामुर्डी, रावेत आणि किवळे भागातील पाण्याचा प्रश्न सोडवण्यासाठी नवीन पाणी टाक्या बांधण्यास निधी उपलब्ध करणे.
पर्यावरण आणि गृहनिर्माण:
- उद्याने व खेळाची मैदाने विकसित करावीत, तसेच ज्येष्ठ नागरिकांसाठी विरंगुळा केंद्रे उभारावीत.
- पीएमआय योजना अंतर्गत पुनावळे, रावेत आणि किवळे येथे परवडणाऱ्या घरांचे प्रकल्प मार्गी लावणे.
- आरएमसी प्लांट्ससाठी पर्यावरण नियमावली बंधनकारक करणे आणि उल्लंघन करणाऱ्यांवर कठोर कारवाई करणे.
महानगरपालिकेतील रस्त्यांचा दर्जा सुधारणा:
- शहरातील रस्त्यांच्या कामांची तपासणी कॉलेज ऑफ इंजिनिअरिंग, पुणे यांच्या मार्फत करण्याचा निर्णय.
या सर्व मागण्यांसाठी महापालिका प्रशासनाने सकारात्मक पावले उचलावीत, अशी मागणी करण्यात आली. आयुक्त श्री. शेखर सिंह यांनी या प्रस्तावांचा गांभीर्याने विचार केला जाईल, अशी आश्वासन दिली. येत्या अंदाजपत्रकात या विकास कामांसाठी आवश्यक निधीची तरतूद होईल, अशी अपेक्षा आहे.
या बैठकीसाठी माजी महापौर सौ. माई ढोरे, माजी पक्षनेते श्री. नामदेव ढाके, माजी उपमहापौर श्री. तुषार हिंगे, अतिरिक्त आयुक्त श्री. प्रदीप जांभळे पाटील तसेच श्री. विशाल मासुळकर, श्री. चेतन घुले आणि संबंधित विभागाचे अधिकारी उपस्थित होते.
