PCMC to Survey and Demolish Non-functional Public Toilets पिंपरी-चिंचवड महापालिकेने मोडकळीस आलेल्या शौचालयांचे सर्वेक्षण सुरू केले

पिंपरी-चिंचवड, ७ मार्च २०२५:
मुख्यमंत्री युवा कार्य प्रशिक्षण योजनेअंतर्गत नियुक्त डेटा एन्ट्री ऑपरेटर्ससाठी जीआयएस अनेबल ईआरपी अंमलबजावणीसाठी तात्पुरत्या स्वरूपात नियुक्ती केली जाणार आहे. यासोबतच, शहरातील वापरात नसलेले, दुरवस्था झालेल्या आणि मोडकळीस आलेल्या सार्वजनिक व सामुदायिक शौचालयांचे सर्वेक्षण करून ते पाडण्यात येणार आहेत. हा निर्णय महापालिका आयुक्त तथा प्रशासक शेखर सिंह यांनी स्थायी समितीच्या सभेत मान्यता दिली.

महापालिका मुख्यालयात स्थायी समितीची बैठक आयोजित केली गेली, ज्यामध्ये प्रशासक शेखर सिंह अध्यक्षस्थानी होते. यावेळी अतिरिक्त आयुक्त प्रदीप जांभळे-पाटील, विजयकुमार खोराटे, चंद्रकांत इंदलकर यांची उपस्थिती होती.

महापालिकेने आणखी काही महत्वाचे निर्णय घेतले आहेत. यामध्ये ताथवडे येथील पशुसंवर्धन विभागाच्या जागेवर मैलाशुद्धीकरण प्रकल्प सुरू करणे, महापालिकेच्या माध्यमिक शाळांमध्ये बसवलेल्या सीसीटीव्ही यंत्रणेचे नूतनीकरण, तसेच महापालिका आणि लाइटहाऊस कम्युनिटीज फाउंडेशन यांच्यातील प्रकल्पाचा करारनामा नूतनीकरण करण्याची मान्यता यांचा समावेश आहे.

याशिवाय, शहरात विविध ठिकाणी जलनिःसारण नलिका टाकणे, सांडपाणी वाहिनी व चेंबर्सची देखभाल करणे, रस्त्यांवरील खड्डे बुजविणे आणि काँक्रिटने चर बुजविणे तसेच पेव्हिंग ब्लॉक्स रिफिक्सिंग करणे, बस थांब्यांची रेलिंग दुरुस्ती करणे आणि हॉटमिक्स पद्धतीने रस्त्यांचे डांबरीकरण करणे यासारखी इतर दुरुस्तीची कामेही केली जाणार आहेत.

महापालिका व प्रशासनाच्या या निर्णयामुळे शहरातील सार्वजनिक सेवा सुधारण्यासाठी महत्त्वाची पावले उचलली जात आहेत. नागरिकांना त्याच्या नियमित व वापरास योग्य सुविधा मिळवून देणे हे यामागील मुख्य उद्दीष्ट आहे.